បាត់ដំបង៖ អភិបាលខេត្តបាត់ដំបង លោក សុខ លូ អំពាវនាវដល់ប្រជាពលរដ្ឋក្នុងខេត្តទាំងអស់ដែលមិនទាន់ចាក់វ៉ាក់សាំង ឬក៏ចាក់វ៉ាក់សាំងហើយមិនបានត្រឹមត្រូវ ដោយចាក់ម្តងហើយឈប់ចាក់ស្មើនឹងបោះចោល សូមទៅចាក់លើកទី១ឡើងវិញនៅតាមទីតាំងដែលបានកំណត់ក្នុងខេត្ត។
លោកបានអំពាវនាវដូច្នេះ ក្នុងពិធីអបអរសាទរទិវាអនាម័យបរិស្ថានជាតិ ថ្ងៃទី២៣ ខែវិច្ឆិកា ឆ្នាំ២០២១ កន្លងទៅដោយបានលើកឡើងឱ្យប្រជាពលរដ្ឋបន្តអនុវត្តវិធានការសុខាភិបាល ជាពិសេស៣ការពារ៣កុំឱ្យបានខ្ជាប់ខ្ជួន។ លោកបន្ថែមថា រដ្ឋាភិបាលនៅតែបន្តចាក់វ៉ាក់សាំងការពារជំងឺកូវីដ-១៩ ដល់ពលរដ្ឋបន្តទៀត ខណៈលោកជំរុញដល់អ្នកដែលមិនបានចាក់ ឬអ្នកដែលចាក់លើកទីមួយហើយខនខានចាក់ឱ្យទៅចាក់វ៉ាក់សាំងឡើងវិញដើម្បីការពារជំងឺកូវីដ-១៩។
លោកថាការចូលរួមរបស់ប្រពលរដ្ឋក្នុងការចូលរួមចាក់វ៉ាក់សាំង គឺជាការចូលរួមដែលមិនអាចខ្វះបានដើម្បីឱ្យកម្ពុជាបើកប្រទេសពេញលេងកាន់តែខ្លាំងបន្ថែមទៀត ជាពិសេសគឺខេត្តបាត់ដំបងតែម្ដង៕
